1月份蜜月旅行，到底去邊度好呢? 日韓台東南亞已經遍佈Shopping魔嘅腳毛，自然想衝出亞洲。
Shopping魔怕凍，如果1月份去歐美，包到成隻糭咁，論論盡盡，影相咪唔靚? 所以，北上亦都唔係一個option，最後決定南下，過一個舒服、溫暖嘅蜜月。
記得之前睇過電視節目《現代塵世美》，淨係聽個名都知有幾咁詩情畫意，再做吓research，真係靚到不得之了，所以最後就扑鎚買機票，去塔斯曼尼亞!
計劃行程
正如如何選購平機票?文中題及，通常越早買機票就越平。事關1月塔省氣候溫和，乃旅遊旺季，Shopping魔格左一大輪價之後早咗足足2個月，買咗QANTAS經墨爾本轉機嘅機票。塔斯曼尼亞有返咁上下大，唔想走回頭路，所以機票係open-jaw的－由北部朗塞斯頓開始，一直走到南部荷伯特結束。
行程大概如下:
旺季除咗機位緊張，宿位都好搶手吓，所以都要盡快決定路線再book住宿。去得塔斯曼尼亞，都係想親親大自然多啲，而且多數景點都係喺郊區，所以塔斯曼尼亞嘅民宿係非常之多，而且非常有特色添! 所以此行大部分時間都係住民宿架!
Shopping魔順手向大家介紹2個最常用嚟搵民宿嘅網頁:
- www.airbnb.com
呢個網站係俾啲民宿自己放上去俾人搜尋的，客人可以留低意見，不妨參考吓。 - www.tripadvisor.com.tw
全球其中一個最大型嘅旅遊網站，有評分有詳盡介紹有排名，最後Shopping魔大部份都係用呢個網站嚟揀該區頭幾名嘅民宿，質素非常之好!
租埋車就盡備好晒，可以出發!
正式起程
其實出發前1個月左右，新聞話塔斯曼尼亞因為天氣乾燥，引發嘅大型山火已經燒咗好耐，都有啲擔心，睇左好多遇到山火時應該點做嘅資料，又download定塔省消防署嘅apps，等我可以避開有火災嘅地方。好彩最後都冇咩事!
終於都出發喇! 零晨由香港出發，去到墨爾本已經係清晨。發現自己竟然唔記得帶黑超，所以喺等轉機嘅時候買咗一副大約HK$200，同埋一張有500Mb數據嘅電話卡去塔省用，都唔貴吖!
下圖就係由墨爾本飛去朗塞斯頓嘅QANTASLINK飛機仔，機程只係1個鐘左右，所以還好。
一落機第一件事就係攞車，風和日麗，正。
第一日行程如下:
朗塞斯頓機場 → Mole Creek Cave → Mole Creek Guest House
因為第二日想去睇Cradle Mountain，所以選擇朗塞斯頓同Cradle Mountain中間嘅Mole Creek，咁就唔使一次過揸好耐車先入到去。
Mole Creek本身冇乜嘢玩，只有一個鐘乳石洞。我哋都未睇過鐘乳石，當然唔可以錯過啦。嚟到Mole Creek Cave，原來每隔一段時間都有導賞團，當日冇乜人，只有我哋同埋另一個外國家庭。導遊話洞入面比外面凍好多，長年都係得嗰幾度，好彩我哋都有備而來，著返件褸就入去。
因為遊客唔多，鐘乳石保養得好好，而且我哋每行到一個區域，先會開嗰區嘅燈，而之前已經行完嘅部份就會熄返燈。入面柔柔嘅燈光，映照到啲鐘乳石好靚。入面其中一個區域更加有一啲會發出藍光嘅昆蟲聚居喺天花，一閃一閃好似星星咁，非常迷人。不過太暗又冇腳架，所以冇影到相。
成個行程大約半個鐘，話咁快就完了，於是就揸車返民宿。
一入到去，有個好仔好熱情咁歡迎我哋，仲好快俾鎖匙我哋上房。我哋話想喺附近行吓，個女仔就話行前600米左右有間便利店，但係6點就關門。當時已經5點半，因為Shopping魔咩街都要行一餐，所以就好緊張咁即刻跳上車駛去睇吓。但係原來間便利店係非常之local非常之細，得啲水呀乾糧呀咁，佢未收鋪就行完嚕，返去食飯。
間民宿好家庭式，氣氛好溫馨，菜式都非常簡單。
其實再過一日就係Shopping魔生日，所以都叫左個蛋糕食。
但可能喺飛機度凍親，食食吓越嚟越病，食之無味，頭暈暈，快快手食完就極速返房沖涼，8點就撻落床瞓。最後喺Mole Creek Guest House冇影過相，唔開心。
待續...
第二天 【魔遊記】迷人塔省 搖籃下的白鴿
第三天 【魔遊記】迷人塔省 法式浪漫甜蜜
第四天 【魔遊記】迷人塔省 最醉人東海岸
沒有留言:
張貼留言