蜜月第四天
是日行程:
朗塞斯頓 → 酒杯灣 → Bicheno → Swansea
醉人酒杯灣
一早喺朗塞斯頓check out之後，就起程去下一個地點 Freycinet National Park 喇。記唔記得Shopping魔之前提過好擔心塔斯曼尼亞嘅山火情況? 雖然去到嘅時候情況已經好咗好多，但係駕車去 Freycinet National Park 嘅途中都見到一片片燒焦、黑漆漆嘅樹林，希望樹林可以快啲重生啦。
National Park 嘅入口有一間旅客中心，裏面有小賣店賣啲得意嘢，又有啲設施俾旅客休息。行咗一陣就出發，去欣賞被評為全球最美麗海灣之一嘅酒杯灣!
想欣賞酒杯灣方法有三。一，就係坐小型飛機喺上空盤旋俯瞰；二，坐遊艇直接駛到海灣感受自然美；因精打細算嘅Shopping魔窮遊塔省，選擇咗最土炮嘅方法，三，行山！
要行到上最高點，亦即係酒杯灣最佳觀賞點，需時約45分鐘，如果想繼續拾級而下，親臨酒杯灣沙灘，就要多1個鐘頭時間。續上回，因為Shopping魔都仲未病好，體力所限，只好選擇行到上look out point就回程。沿途風光如畫，行到攰就坐低休息吓，所以都唔算辛苦。行咗大約20分鐘，終於有返咁上下高度，開始望到個海喇，所以喺Coles Bay look out呢個位停低休息影相欣賞海景。
除咗海景之外，沿途嘅奇石都係一個影相位，你睇!
行下抖下影下傻下，冇幾耐就上到去Wineglass Bay look-out嚕。我想講，酒杯灣真係好靚呀! 啲沙好白，啲水又藍又綠咁，海面又好平靜，海岸線灣灣長長，難怪世界知名。
上到山頭最高點，四周都好空曠，所以超級大風。雖然係盛夏，但都吹到有少少凍，好彩有帶外套咋!
上山用咗好多時間，落山時就一鼓作氣衝去! 陪住我落山嘅，除咗有佢！
仲有佢！
哈哈佢走得太快淨係影到佢衝返入bush入面，今次真係bye bye你條尾！
講開又講，呢隻係一隻Wallaby，即係體型細隻一啲嘅袋鼠。Wallaby係其中一種塔斯曼尼亞最常見嘅野生動物，基本上每一日都喺馬路上見到好多隻，只不過呢隻係Shopping魔喺度第一隻見到仲係生勾勾嘅Wallaby...
行完山，緊要搵嘢醫醫肚啦！一下站就係附近嘅Freycinet Marine Farm，真係諗起都興奮。
就喺Freycinet郊野公園出產嘅生蠔係何其新鮮何其精彩何其價廉物美！
仲有多款口味，
同埋燒帶子燒鮑魚等選擇，好滿足啊！
喺咁舒服嘅環境下食咗一餐咁正嘅lunch，簡直冇野可以挑剔。
食飽飽就繼續南下，首先去位於Swansea嘅民宿check-in先。
今晚下榻嘅係Redcliffe House Swansea，喺民宿旁邊有一個農場，仲養咗好多動物添! 一到埗首先有熱情嘅Molly迎接Shopping魔。
然後點會諗到牧羊狗嘅好朋友會係棉羊Bobby?
Bobby掛住食草都唔肯理吓人，真係好難捉摸呀哈哈！
神奇的東部海岸
Swansea係一個蚊型社區，本身冇咩景點，所以放低行李之後就趁住未日落，去另一個小鎮Bicheno。
Bicheno其中一個最出名嘅景點就係呢一個噴水洞。佢嘅形成係由海浪衝擊加上空氣壓縮，最後將海邊岩石侵蝕到穿咗個窿而成。所以當有浪拍埋嚟嗰陣，海水就由個窿衝上半空。
好彩嘅話仲可以睇到彩虹添！影得好淺色，唔知你睇唔睇到？
就喺噴水洞旁邊仲有另一個天然地貌，橙色岩石。
石頭入面嘅礦物質氧化之後就變成鮮艷嘅橙色，又真係幾似生銹喎！其實除咗Bicheno之外，東海岸北部嘅Bay of fires都有橙色岩石群，而且更大規模，之但係呢處比較就腳，反正都好靚丫係咪？
然後就去逛逛呢個小社區，見到呢個好繽紛嘅嘉年華。
然後好求其咁食啲嘢就去到今日嘅重頭戲！
原來澳洲係有企鵝睇架！於是前２晚報咗Bicheno Penguin Tours嘅企鵝觀賞團，等人齊就上呢架大巴出發！
每一晚企鵝都會喺入黑嘅嗰一刻返返上岸，再列隊行返巢穴，所以我哋一定要預早少少去到佢哋嘅必經之路等待黑夜嘅來臨。
然後，終於等到天色變暗，小企鵝準備返屋企喇！因為企鵝係野生動物，影相嘅閃光燈會傷害到佢哋，所以如果想睇吓佢咃點樣行上嚟，點樣搵返自己個巢，點樣搵返自己個bb，企鵝屋企同蛋係點樣，就要親身去睇喇！
睇完之後就揸車返民宿。因為要由Bicheno返返去Swansea，而塔斯曼尼亞嘅郊區係冇街燈架！所以要行得好慢，一來唔係好望到條路，二來係間唔中都會有啲小動物會跑出馬路，要小心撞親佢哋，最後3個字嘅車程足足用咗半個鐘先完成。
終於返到民宿就瞓嚕早抖。
待續...
第二天 【魔遊記】迷人塔省 搖籃下的白鴿
第三天 【魔遊記】迷人塔省 法式浪漫甜蜜
第五天 【魔遊記】迷人塔省 始於朗塞斯頓
