自駕遊 - 優點缺點大比拚

依家越來越流行自駕遊，令旅程更加隨心所欲，唔使受制於公共交通工具限制。Shopping魔為大家綜合自駕遊嘅優點缺點，等您可以根據自己需要而決定需唔需要租車，抑或搭巴士更方便！

優點

1. 衝出市區

大部份公共交通都只在市區運行，唔係所有景點都可以靠公共交通去架，尤其是人煙稀少嘅郊區，就算有，分分鐘一日只係得幾班車，一miss咗就唔使去嚕。

有車在手，想去幾遠都得啦！

2. 彈性路線

行車期間見到好靚嘅風景想停低影張相，或者見到間鋪頭想落車借洗手間跟手買啲嘢？做交通工具嘅乘客就冇呢個option喇。

自駕遊鍾意去邊度就去邊度，如果突然想轉路線，臨時有人介紹您去一間受本地人歡迎嘅餐廳，都可以一一實現啦！

3. 隨時出發

一旦離開市區，公共交通班次就會變得非常疏落，可能幾個鐘先得一班車，而且好多時入夜之後就停止服務。去旅行都係想輕輕鬆鬆鄧梓豐啫，所以我拒絕俾行車時間表框死。

想睇埋日落，食埋宵夜先返？如果唔想露宿街頭或者搭的士，都係租車自駕遊自由啲。

4. 直達目的地

靠交通工具遊覽，好多時都冇車直達要轉車；而由一個景點去另一個景點，更加可能要走回頭路，返回中間點轉車。

所以自駕遊先可以玩得更有效率，時間好寶貴，要好好珍惜身在外地嘅時光啊！

5. 其實唔貴

世界各地的士錢/車費可以相差好遠，但唔知點解租車錢分別唔係太大。變相喺高消費國家（歐美澳日等地），租車比搭的士或長途車更加抵，如果儲齊4人1車就仲抵！

6. 無行李一身輕

Shopping完幾十袋，又重又論盡，一係就死頂，一係就返酒店放低啲戰利品再殺過。但一來一回都要唔少時間，不如將一袋二袋直接放上車繼續搏殺來得痛快！

如果有需要轉酒店就仲大單，拎住個唿又唔可以周圍走。您話如果可以check out完出去慢慢玩個夠先驅車去第二間酒店check in，係幾咁美好呢？

7. 路上景點

有時候，揸車本來就係個景點。嗱唔係淨係指嗰啲成隊車隊揸住幾百萬法拉利去德國古堡食個早餐嗰啲超級富豪團呀，我就試過揸車上山欣賞沿山路櫻花，又試過行一條起喺碧海上嘅天橋，如果冇車，豈不是去唔到嘥晒?

8. 唔使搵路

好多時租車都會有埋GPS導航，不論內置抑或另租。用法非常簡間，通常就咁入目的地嘅電話號碼入去就可以，只要跟住GPS導航咁行，一般都可以準確到達目的地。

如是者，就算您唔識睇地圖，就算您冇做定功課，就算您冇漫遊數據開google map搵路，就算您唔識路，都可以輕鬆去到目的地啦！

9. 當自己屋企得喇

喺私家車車箱，您可以食嘢，可以食厚多士，可以食菜肉，可以食洋蔥圈，可以食花生，可以大聲講嘢，可以講粗口，可以講電話，可以拍片擺上網，可以聽歌，可以唱歌，真係，諗起都覺得興奮呀！

缺點

1. 酒精0容忍

其實你喺香港又好外國都好，飲咗酒食咗藥真係唔好揸車。

2. 路面情況有別

左軚、交通燈、快慢線、巴士線、車速限制、單線雙程等等，香港同外國路面情況可以好唔同，一個唔覺意，就可能會觸犯當地交通法例架喇！

3. 塞車

所有大城市市中心都有一個通病，就係塞車，仲要係塞到阿媽都唔認得嗰隻，返放工時間更加連阿爸都唔係好認得。

唔想塞在路面上的話，就迫地鐵啦，如果唔怕人多到阿嫲都唔認得的話。

4. 小心抄牌

市區泊車位不足，而且通常都唔平。但總好過周街亂泊食牛肉乾吖！

5. 冇得訓

有邊個鍾意一上車就瞓嘅同學請舉手...咦點解冇人舉手嘅？唔使怕羞喎...嗱係您喇我認得您呀上次扮瞓唔讓座俾阿婆嗰個吖嘛，係您喇...咩話您話我認錯人？冇理由喎係您喎...

什麼是格價搜索引擎 Why Metasearch?

網上有一啲免費搜索引擎提供格價服務俾旅客，將其他網站、網上旅行社、航空公司官網等所售賣嘅機票、酒店、租車資料集中，整合，再顯示俾旅客睇，免卻周圍格價嘅煩惱。

呢啲引擎稱為Metasearch，其中最為香港人熟悉嘅有Trip Advisor(到到)、Skyscanner同又飛啦! Flyagain.la等等。

Metasearch用法好簡單，只要喺佢咃嘅網頁輸入想去嘅目的地同旅遊日子，佢哋就會清楚列明各網站提供嘅貨品，咁旅客就可以一目了然。

咁到底用Meta search有咩好處呢？

1. 用法簡單

Meta search用法好簡單，好似平時搵資料咁，喺佢咃嘅網頁輸入想去嘅目的地同旅遊日子，佢哋就會自動搜尋世界各地一籃子嘅網站，將得出嚟嘅結果一次過顯示出黎。

2. 馬照跑，舞照跳

由於佢哋只係負責搜尋，所有交易都會redirect返去產品供應商度進行，所以可以放心，積分照儲，promo code照用，信用卡優惠照攞。

3. 免費

大家係唔需要擔心隔多一層中間人就會貴咗嘅，因為佢哋每做得成一單生意，都會向供應商抽返佣架！

4. 一目了然

Metasearch集合晒啲價錢之後，仲會幫你加埋燃油同稅先顯示出嚟。唔好睇少呢個function呀，尤其是長途機嘅話，可以差好遠架! (off topic一下) 舉個例，香港去倫敦，如果直航要$3,000，經多哈轉機要$2,000，雖然比直航平$1,000，但係轉機除左要花更多時間，仲要俾多程燃油同稅，分分鐘得不償失架；又或者個別航空公司係唔收燃油附加費或者收平啲，如果係轉機或長途機個燃油費都仲襟計。所以用連稅後嘅價格去比較就穩陣好多啦！

另外佢嘅篩選功能仲好方便添！你可以根據個人喜好排列、篩選結果。你想揀咩航班時間，直航定轉機，酒店要幾星級，只要噤幾個制，就會順價錢咁排晒出黎等你揀，真係好清楚啊！

當然，幾時都係要貨比三家，因為總會有一啲供應商係Meta search冇覆蓋嘅 (尤其是廉航)。而且要留意供應商嘅信譽，如果幫襯左黑店，搜索引擎由於唔係供應商，都冇辦法幫你架。

如何選購平機票?

知道我鍾意旅遊，好多朋友都會問我一啲購買旅遊產品嘅貼士。咁到底點樣先可以買啲平靚正嘅嘢呢？

今次先教大家點買平機票。

1. 留意Shopping魔旅遊日記

(賣吓廣告先)

點解要信我？ Shopping魔熱愛旅遊，熱愛到讀書讀旅遊，畢業之後又做過航空公司同旅行社，對業界資訊聊如指掌，咩為之貴咩為之平，心中有數。

旅遊乃奢侈品 (但唔知點解關愛基金將遊學定位為必需品，綜援戶又投訴去得太少旅行)，慾望無盡而金錢有崖，要去得平去得密去得有質素，唯有不斷睇實個市。

2. 旅遊淡旺季

旅遊淡季旺季，機票價錢可以差好遠。人人都想唔使請大假就可以出走，所以大時大節long weekend航空公司就會吊高黎賣。所以如果想買平機票，就必須要避開呢啲日子。

另外每個星期每日都有分出發回程高峰期，一般星期一、二都會比較少人出發，而星期四五就少啲人回程；少啲人選擇夜機出發，選擇早機回程。將貨就價，知道邊啲航班冇咁受歡迎，就估到買咩有得平喇！

3. 早買早享受，遲買平2舊

一般黎講，機票係越早買越平。當一班機仲有好多位嘅時候，航空公司為求有足夠收入去支持一班機嘅營運成本，會用平價機票去吸引乘客。之後因為機位賣一個少一個，當然會越賣越貴。

咁點解遲買又會平2舊？如果離出發日期越來越近，但係班機仲有位，要增加收入，就唯有靠last minute特價機票黎散貨。其中國泰港龍嘅fanfare就係表表者。

不過如果係非去不可嘅旅遊，最好都係早啲準備啦！

4. 機票格價平台 (Metasearch)

網上有一啲搜索引擎台集合晒所有機票供應商嘅，例如港人熟悉嘅Skyscanner同又飛啦! Flyagain.la，都有提供呢種功能，而且係免費，可信性高，非常值得參考。當然有時候未必可以盡信，都係貨比三家好。

5. 追蹤航空公司、旅行社、旅遊資訊網Facebook page

供應商有平嘢出，當然都會第一時間靠自己嘅頻道公佈啦，尤其係限量限時嘅特價產品，以香港人手機不離身，沉迷facebook嘅程度，足以令供應商提供最即時嘅優惠俾大家。

而旅遊資訊網，所指嘅係又飛啦! Flyagain.la，MeetHK.com 旅遊情報網 等網站，一有咩荀嘢同漏洞都會通知fans，社交媒體嘅影響力之大，真係唔到你唔服呀!

不過見到優惠都要冷靜，記住貨比三家呀!